Azərbaycan Kanadada futuroloqların beynəlxalq konfransında təmsil olunub – Foto

Azərbaycan Futuroloqlar Cəmiyyətinin sədri Reyhan Hüseynova iyulun 26-27-də Kanadanın Toronto şəhərində təşkil olunmuş Minilliyin Layihəsinin illik hesabat konfransında iştirak edib.

Gün.Az xəbər verir ki, bundan sonra o, məşhur futuroloqların iştirak etdiyi Dünya Gələcəyin Tədqiqatları Cəmiyyətinin (World Future Society 2012) illik konfransında iştirak edib.

Reyhan Hüseynova artıq üçüncü ildir ki, bu konfranslarda Azərbaycanı Minilliyin layihəsinin Azərbaycan bölməsinin sədri kimi təmsil edir.

R.Hüseynova konfransda çıxış edərək cəmiyyətin il ərzindəki fəaliyyətindən bəhs edib, növbəti il üçün inkişaf perspektivləri haqqında məlumat verib.

Bu il konfransda Minilliyin layihəsinin  Kanada, Meksika, Venesuela, Mərkəzi Avropa, Finlandiya, Almaniya, Böyük Britaniya, İspaniya, Çin, Yaponiya, Misir, Sloveniya, Brüssel bölgəsi, Dominikan Respublikası, Silikon vadisi və Kiber bölmələrinin sədrləri iştirak ediblər.

Minilliyin layihəsinin direktoru Cerom Qlenn və Ted Qordon (ABŞ) “Gələcəyin Durumu 2012” hesabatını təqdim edərək son tədqiqatlar və əsasən onlayn rejimdə layihə tərəfindən aparılmış bütün tədqiqatların fasiləsiz yenilənməsinə imkan verəcək Qlobal Gələcəyin Kollektiv Kəşfiyyat Sisteminin (Global Futures Collective Intelligence System) yaradılması haqqında məlumat verib.

Dünya Gələcəyin Tədqiqatları Cəmiyyətinin  konfransında isə əksər ölkələrdən mindən artıq alim  iştirak edib.

R.Hüseynova Azərbaycanın bu gün və gələcək gündəliyində duran ən vacib məsələlər və bu məsələlərin həllində gələcəyin araşdırmalarının nə cür rol oynaması haqqında çıxış edib və Prezident İlham Əliyevin “Azərbaycan – 2020: Gələcəyə baxış” İnkişaf Konsepsiyasının hazırlanması haqqında  fərmanı barədə məlumat verib.

R.Hüseynova AFC-nin Minilliyin layihəsi, Rabitə və İnformasiya Texnologiyaları Nazirliyi və Prezident yanında Strateji Araşdırmalar Mərkəzi ilə birgə həyata keçirdiyi ən son layihələrdən biri -Azərbaycanın Gələcək Durumu İndeksi (AZ-SOFI – Azerbaijan State of the Future Index) hesabatı haqqında da danışıb.

Qeyd edib ki, bu araşdırmanın ilk mərhələsində ölkənin gələcəyi üçün əhəmiyyətli olan 20 dəyişənlər və ona təsir göstərən 24 hadisələr nəzərə alınmış, növbəti addım kimi 100-dən çox alim və ekspertlərin təcrübəsindən və dəyərli biliklərindən istifadə edərək Delfi (RTD) metodu vasitəsilə onlayn tədqiqat sorğusu keçirilib.

R.Hüseynova Azərbaycanda gələcəyin araşdırmalarının inkişafı və tədqiqi, proqnozlaşdırma sahəsi üzrə gələcək nəslin yetişməsində Azərbaycan Dövlət İqtisad Universitetində tələbələr üçün artıq 3 ildir ki, həyata keçirilən onlayn, ingilis dilli “Azerbaijan Foresight” tədris-təlim layihəsi haqqında da ətraflı məlumat verib.

Pərvanə Sultanova
Gün.Az